0

Мұхтар Әуезов атындағы №20 жалпы білім беретін мектепте жазушының бюстісі мен музейі ашылды.

Мұхтар Әуезов атындағы №20 жалпы білім беретін мектепте жазушының бюстісі мен музейі ашылды.

«Саралапты салмақ ой, сөз асылын ағытып,

Айта алған жоқ әлі ешкім, Мұхтарынан асырып

Өзегінің нәрі алтын, өсиетті сөзіне

Төрткүл дүние, күллі әлем, отыр бүгін бас иіп» - дегендей, күллі адамзатқа «Абай жолы» роман-эпопеясымен танылған Мұхтар Омарханұлы болса, Абай өмірін суреттей отырып, қазақи болмысты паш еткен Абай жолының да алар орны ерекше.

1989 жылы пайдалануға берілген мектеп ғимараты, бүгінде мыңдаған түлектерді ұшырған, сан шәкіртті білім нәрімен сусындатқан білім ордасы, яғни №20 Мұхтар Әуезов атын еншілеген- қасиетті қара шаңырақ. Биылғы оқу жылы Мұхтар Әуезовтің туғанына 125 жыл толуына орай мектебімізде заңғар жазушы, ұлы тұлға М. Әуезовке арналған ескерткіш-бюст және музей бөлмесі ашылды. Осындай игі бастамалар аясында ұйымдастырылған салтанатты шараға ұстаз-ардагерлер, қаланың ардақты азаматтары, білім саласына еңбегі сіңген бірнеше жыл сол мектептің өркендеуіне үлес қосқан бұрыңғы мектеп басшылары, ұстаздары, музейдің ашылуына үлес қосқан азаматтар мен облыстық білім басқармасы басшысының орынбасары Г.Мамаева қатысты. Келген қонақтар ішкі жылы лебіздерін білдіріп, ескерткішке гүл шоқтарын қойды.

Ақтау қаласының құрметті ардагері Іңірбайұлы Есберген Мұхтар Әуезовке арналған кеуде мүсінді (бюст) ашу рәсімін жасаса, бұрыңғы мектеп директоры Керім Жолдыбайұлы музей кабинетінің лентасын қиып, алдағы мүмкіншіліктерге бастау алар жолды сілтеді. Әлем әдебиетінің алыбы, көркемсөз кемеңгері Мұхтар Омарханұлының музейі бөлмесіне саяхатты 11 сыныптың үздік оқушылары: Утеева Ақниет пен Құдабаева Салтанат жүргізді.

Мереке барысында «Көңілашар», «Сарыарқа», «Жеңіс» күйлері ойналып жатты.

Музейден шыққан қонақтар легі дәлізде көрсетілген қойылым мен оқушылар дайындаған Абай әндерінен хорды тыңдап, акт залға бет алды.

Осыдан дәл 105 жыл бұрын, яғни 1917 жылы 21 жастағы Мұхтар Әуезов ең алғашқы драмалық шығармасы «Еңлік–Кебек» пьесасын Абай ауылында сахналаған болатын. Аталған пьесадан үзінді тамашаланды. XІX ғасырдың асқар белі -Абай болса, XX ғасырдың Заңғар биігі - Мұхтар Әуезов екенін ескеріп, Мұхтар шығармаларының өзекті жерлерінен образды айқындайтын, қазақи намыс пен ұяңдықты дәріптейтін жазушы шығармаларынан көріністер кезең-кезеңімен көрсетіліп жатты.

Шара соңында қазақ тілі мен әдебиеті пәні мұғалімі Раушан Абилованың сөзіне жазылған, «Алға, мектебім!» гимні орындалды.

Абай ілімін дәріптейтін қарашаңырақтың тұғыры мықты болғай!