0

Ашық далалық «Жас геолог» жарысы

    Ашық далалық «Жас геолог» жарысы

    Оқушыларға туған өлкенің табиғаты мен минералдық қазба байлықтарын таныту, географиялық және геологиялық білім-танымдарын және зерттеу жұмыстарына қызығушылығын арттыру мақсатында өткізілген облыстық ашық далалық «Жас геолог» жарысында 48 қатысушы арасынан қалалық кезең жеңімпаздары топ жарды.

   Ережеге сәйкес қатысушылар жарыстың бірінші күні «Іздеу зерттеу жұмыстары» және «Зерттеу жұмыстарының көрмесі» номинацияларында Маңғыстау өлкесінің тарихи-мәдени нысандарына зерттеу жұмыстарын жүргізіп, табылған материалдар мен бұйымдардың көрмесімен таныстырды. Сонымен қатар, «Минералогия», «Геоэрудит» номинацияларында геологиялық, географиялық сұрақтарға жауап бере отырып, экрандағы ұяшықтарға жасырылған минералдарды тауып, толық сипаттады. «Палеонтология», «Геоәліппе» номинацияларында палеонтологиялық терминдердің анықтамасын келтіріп, Қазақстанның география, геология саласында ерекше із қалдырған ғалымдар туралы сұрақтарға жауап берді.

   Жарыстың екінші күні практикалық бағытта ұйымдастырылып, «Далалық тұрақ» номинациясында туристік шатырларды жылдам әрі дұрыс құру, сондай-ақ, алау жағу және оның ерекшеліктері мен айырмашылықтары көрсетілді. «Қауіпсіздік техникасының негіздері» номинациясында оқыс жағдайлар кезіндегі алғашқы медициналық көмек дағдыларын орындап, түрлі ситуациялық сұрақтарға жауап берді. «Гидрология» номинациясында жасанды су каналының тереңдігін, енін, ағысын, су шығынын өлшеу құралының көмегімен есептеу арқылы гидрологиялық зерттеу жұмыстарын жүргізді.

  Қатысушылардың теориялық және практикалық білімдері зерделеніп, нәтижесінде мамандандырылған IT лицейінің «Uranium» тобы І орын иеленді.

    Сонымен қатар, көрсеткен жеке жетістіктері үшін: Ақтау қаласы, мамандандырылған IT мектеп лицейінің 9-10 сынып оқушылары Хамитова Анеля, Бекетова Аяна, Чигреев Бахтияр, Габдуллин Ернур білім басқармасының дипломдарымен марапатталды.