МАҢҒЫСТАУДА ІІІ ТОҚСАННАН БАСТАП МЕКТЕПТЕРДЕ 1, 2, 3, 4, 5, 9, 11 СЫНЫПТАР ҮШІН КЕЗЕКШІ СЫНЫПТАР АШЫЛАДЫ.

Бұл туралы Маңғыстау облысының қоғамдық коммуникация орталығында өткен брифингте Маңғыстау облысы білім басқармасы басшысының міндетін атқарушы Г.Мамаева мәлімдеді.

Короновирустық инфекцияның алдын алу бойынша еліміздің бас санитарлық дәрігерінің қаулысы және ҚР білім және ғылым министрлігінің бұйрығы негізінде ІІІ тоқсандағы білім беру ұйымдарының жұмысы келесі тәртіпте жүзеге асырылады:

- меншік түріне қарамастан барлық мектептерде 1,2,3,4,5 сыныптарға арнап толымдылығы 15 баладан аспайтын кезекші сыныптар ашылады. Қазіргі кезде бұл сыныптарға 77463 бала (86%) келеді деп жоспарлануда;

- 9, 11 сыныптар аралас форматта оқытылады. 9, 11 сыныптарда математика, қазақ тілі, орыс тілі, шет тілі, физика, химия, биология, алгебра, геометрия, тарих және т.б. пәндер мектепте оқытылады. Яғни, барлық пәннің 70%-ы штаттық форматта мектепте, 30%-ы қашықтықтан оқытылады;

- меншік түріне қарамастан 300 оқушыға дейін контингенті бар мектептер сынып толымдылығы 15 баладан аспайтын, барлық санитарлық жағдай жасалған ғимараттарда жұмыс жасау рұқсат етіледі;

- білім беру мекемесі әкімшілігінің шешімі бойынша сабақтан тыс уақытта 5 адамнан аспайтын топтарда оқушыларды жеке оқытуға рұқсат беріледі;

Бітіру сыныптары түлектерін оқу жылының соңында қорытынды аттестаттау, олардың колледждерге түсу үшін кешенді емтихандар мен жоғары оқу орындарына түсу үшін ҰБТ тапсыратыны және бастауыш сынып оқушыларына оқу бағдарламаларын сапалы меңгеру ескерілді.

1-5 сыныптар үшін ұйымдастырылатын кезекші сыныптарға қабылдау ата-аналардың немесе оқушының заңды өкілдерінің өтініші негізінде жүзеге асырылады.

Мектептерде икемді сабақ кестелері жасалып, сабақтар арасындағы үзілістер әр түрлі сыныптар үшін әр түрлі уақытта ұйымдастырылады, сондай-ақ әлеуметтік қашықтықты сақтау үшін ауысымдар саны көбейтіледі.

Дәстүрлі режимде оқытатын мұғалімдердің жас ерекшеліктері (65 жастан асқан мұғалімдер) мен денсаулық жағдайлары ескеріле отырып, қашықтықтан оқытуға ауыстырылады.

Мектептерде балаларға және қызметкерлерге арналған: мәдени-спорттық көпшілік шаралар, директор жанындағы жиналыстар мен педкеңестер жалпы адам шоғырландырылатын ауқымды шаралар өткізілмейді.

Мектептердің медициналық пункттері күшейтілген режимде жұмыс жасайды.

Бастауыш сыныптардың сабақтары таңғы сағат 09.00 де, жоғары сыныптарға түстен кейін 14.00 де бастау ұсынылады. Сабақтар ұзақтығы 40 минут, үзілістер кестесі әр сынып үшін бөлек жасақталады.

Ата-аналар балаларын санитарлық қорғаныш құралдарымен жабдықтауға міндетті (маскалар, дезинфекторлар, және т.б.), сонымен қатар балаларына көпшілік ортадағы өзін-өзі қорғау мен мектептегі әлеуметтік ара қашықтықты сақтау бойынша түсінік жұмыстарын мұқият жүргізулері тиіс.

Мектептерде барлық санитарлық шараларды сақтау шаралары қабылданды, оның ішінде санитайзерлермен, тепловизорлармен, бактероцидтік лампалармен, т.б. қамтамасыз етілді.