0

"ШЕБЕРЛЕР ШЕРУІ" челленджі жалғасуда

    21 қазан күні "Шеберлер шеруі" челленджі № 13 гимназияның 4 сыныбында Кенжегүл Берішбайқызының "Мен бақытты баламын" тақырыбында әдебиеттік оқу пәнінен ашық сабағымен жалғасты. Сабаққа жас мамандар ғана емес ,еңбек өтілі 15-20 жыл болған тіс қаққан мамандар да қызығушылық танытып қатысты.

    Сабақ өте жоғары деңгейде өтіп,көпшіліктің көңілінен шықты. Сабақтың құрылымы да,таңдалған әдіс - тәсілдер де өте жүйелі және тиімді болды. Десант сабақ болғанына қарамастан, мұғалім мен оқушылардың арасында өте тартымды , жылы қарым - қатынас сабақтың бастапқы кезеңінен -ақ өрби берді. Оқушылар ұстазға бірден бауыр басып,сабаққа ұйымшылдықпен зейін қоя араласты.

   Қолданған көрнекіліктері мен тапсырмаларының бәрі аз уақытта көп мағына бере алатын мазмұны кең ауқымды болғанын ерекше атап өткен жөн. Ең қызығы, мектепте сабақ басталмастан бұрын электр жарығы өшіп қалған болатын. Бұл келеңсіз жағдаят 2 сағатқа созылатыны ескертілді.Әрине бұл жағдай мұғалімдерді де ,оқушыларды да қатты алаңдатқан болатын. Бірақ майталман ұстаз сабырлы қалпымен ,еш абыржымастан жымия сабағын бастай берді және ол өзінің шынайы шебер екендігін осы жерде тағы бір дәлелдеп өтті.Сабақ үрдісінде интертақтаның жұмыс істемеуі еш кедергі бола алмады.Мұғалім жайлы орта қалыптастыра отырып, жоспарға сәйкес өте сапалы сабақ өткізіп шықты.

   Тиісті тапсырмалардың бәрі өз деңгейінде орын-орнымен орындалып жатты. Бала тәрбиесінде соңғы кезде еленбей қалатын ұлттық құндылықтарды , салт-дәстүрге құрметті , Абай атамыздың еңбектерін дәріптеуді бүгінгі тақырыппен,ортақ тақырыппен және математикадағы «Уақыт» тақырыбымен әдемі сабақтастыра білді.Үш топқа берілген үш сандық арқылы оқу мақсатын да ,адами құндылықтарды да,ғылыми жобаға бағыт бағдар беруді де жүйелі жүзеге асыра білді. Тапсырманың бәрі және бағалау үдерісі сол сандық арқылы орындалып отырды. Тіпті сол сандықтың ішіне айна қойып, балаларға өздерін көрсетуі ,яғни, «мына сандықтың ішінде ең бақытты бала бар, соны көріңіздер» деп, жеке –жеке көрсеткендегі балалардың таңданған ,әрі қуанған жүзін көру өте әсерлі болды. Олардың шын бақытты балдырғандар екеніне көздерін жеткізе алды. Ал чипсидің зиянын айта келе, шырпымен өртегенде чипсидің жанғанын көрген балалар енді ол тағамды жемейтіндей болғаны сөзсіз.Сабақ құрылымының маңызы жағынан да,техникалық ақаулардан сүрінбей өту жағынан да, Кенжегүл Берішбайқызы жас мамандар үшін үлкен шеберлік сыныбын тарту етті,ал оқушылар үшін ерекше мәнді сабақ болды.